ABŞ-ın keçmiş prezidenti Bill Klinton yeni avtobioqrafik kitab yazıb. Kitab rəsmən 19 noyabrda satışa çıxarılacaq.

"Vətəndaş” (ing. “Citizen”) adlandırılan yeni kitab oxucu ilə görüşmədən hadisəyə çevrilib. Çünki dünya çapında olan qlobal mediaya bəlli olub ki, Klinton öz kitabında Monika Levinski ilə münasibətlərinə dair bir sıra fraqmentləri açıqlayıb.

Musavat.com xəbər verir ki, bu barədə yazan “The Guardian”ın məlumatına görə, Klinton sonda Levinskiyə yalnız ən yaxşı arzularını çatdırıb. 

Xatırladaq: 1998-ci ildə Klintonun Ağ Evdə təcrübəçi olan 22 yaşlı Monika Levinski ilə münasibətləri partlaq verərək, ictimailəşmişdi. O zaman təxminən 50 yaşında və evli olan Klinton əvvəlcə bu əlaqəni inkar etsə də, sonradan ictimaiyyətdən üzr istəmiş və Nümayəndələr Palatası tərəfindən impiçment edilmiş, lakin Senat tərəfindən bəraət almışdı.

Kitabında Klinton 2018-ci ildə NBC-də aparıcı Kreyq Melvinlə keçirdiyi müsahibəni xatırlayır.

“MeToo” hərəkatına istinad edən Melvin qəfildən Levinskini xatırladaraq, bu gün də eyni vəziyyət yaşanarsa, prezidentin istefa verib-verməyəcəyini soruşub. Klinton mənfi cavab verərək, impiçmentin qanunsuz olduğunu bildirib.

Melvin daha sonra Levinskinin “MeToo” hərəkatının onun cinsi qısnamaya baxışını necə dəyişdiyi barədə köşə yazısından bir parça oxuyub və Klintonu Levinskidən şəxsən üzr istəmədiyinə görə qınayıb. Klinton isə kitabında bu barədə yazır: “Mən ondan və incitdiyim hər kəsdən üzr istədiyimi söylədim. Sonrakılar məni təəccübləndirdi. Amma sən ondan üzr istəmədin, heç olmasa danışdıqlarımıza görə. Mən məyusluğumu çətinliklə saxlaya bildim, çünki cavab verdim ki, mən onunla heç vaxt birbaşa danışmamışam, amma bir neçə dəfə üzr istədiyimi açıq şəkildə demişəm.”

Klinton əlavə edib: “Mən hər zaman bununla yaşayıram. Son bir neçə il ərzində Monika zorakılığa qarşı kampaniyasında çoxlu yaxşı və vacib işlər görüb və o, ABŞ-da və xaricdə layiqli tanınıb. Mən ona yalnız ən yaxşısını arzulayıram.”

2021-ci ildə “Today” şousunda Monika Levinskidən soruşublar ki, o, Klintonun ona üzrxahlıq borclu olduğunu düşünürmü? O, belə cavab verib: “Mənə lazım deyil. Mən incitdiyim və hərəkətlərimdən zərər görən insanlardan üzr istəmək arzusunu hiss etdiyim kimi, o da özü üzr diləməyi istəməlidir.”

Musavat.com bildirir ki, Monika Levinski və Bill Klinton qalmaqalı tarixin ən böyük siyasi qalmaqallarından biridir.

Monika Levinski

1998-ci ildə ABŞ-ın siyasi tarixinə damğa vuran Monika Levinski və o zamankı prezident Bill Klinton arasındakı qalmaqal ictimaiyyətin diqqət mərkəzinə düşdü. Bu hadisə yalnız Klintonun prezidentliyinə təsir etmədi, həm də ABŞ tarixində impiçmentə səbəb olan ikinci prezident hadisəsi olaraq yadda qaldı.

Qalmaqal necə başlamışdı? 

Monika Levinski 1995-ci ildə 22 yaşında Ağ Evdə təcrübəçi olaraq işə başladı. Təxminən iki il ərzində Klinton və Levinski arasında yaxın münasibətlər inkişaf etdi. Onların bu münasibəti 1998-ci ildə ictimailəşdi və bu, ABŞ siyasətində böyük rezonansa səbəb oldu.

Levinskinin keçmiş həmkarı Linda Trip, Monikanın özəl söhbətlərini səs yazısı olaraq, qeydə almışdı. Bu söhbətlərdə Levinski Klintonla olan münasibətindən detalları ilə bəhs etmişdi. Trip bu yazıları hüquq-mühafizə orqanlarına təqdim etdi. Sonradan bu məlumatlar ictimailəşdi və Klintonun ilk əvvəl inkar etdiyi münasibətləri daha sonra qəbul etməsinə səbəb oldu.

Klinton əvvəlcə münasibətləri inkar edərək məşhur “Mən o qadınla münasibətdə olmamışam”, ifadəsini işlətmişdi. Lakin Levinskinin təqdim etdiyi maddi sübutlar – xüsusən də onun geyimi – bu iddiaları təkzib etdi. Bu sübutlardan sonra Klinton münasibətləri qəbul etdi və xalqdan üzr istədi.

İmpiçment prosesi

Hadisə Klintonun impiçmentinə səbəb oldu. O, Nümayəndələr Palatası tərəfindən yalan ifadə verməkdə və ədalətə mane olmaqda ittiham olundu. Lakin Senat Klintona bəraət verərək, onu vəzifəsindən uzaqlaşdırmadı. Buna baxmayaraq, bu qalmaqal onun prezidentliyinə böyük kölgə saldı.

Bill Klinton bu qalmaqaldan sonra ictimai imicinə zərbə alsa da, prezidentlik müddətini başa vurdu. Levinski isə uzun illər mediadan uzaq qaldı. Sonradan o, fəal şəkildə ictimaiyyət qarşısında çıxış etməyə başladı və xüsusilə zorakılıq və cinsi qısnamaya qarşı mübarizədə iştirak etdi.

Monika Levinski verdiyi müsahibələrdə bu hadisədən sonrakı həyatını “çətin, lakin öyrədici bir dövr” kimi xarakterizə edib. O, həmçinin Klintonun şəxsən üzr istəmədiyini, lakin bunun artıq onun üçün vacib olmadığını bildirib.

Monika Levinski və Bill Klinton arasındakı qalmaqal həm siyasi, həm də ictimai səviyyədə böyük bir hadisə olaraq qalır. Bu qalmaqal cinsi qısnama, güc və şəxsi məsuliyyət kimi mövzuların ictimai müzakirəyə çıxarılmasında mühüm rol oynadı. ABŞ siyasətində isə bu hadisə uzun illər müzakirə mövzusu olaraq qaldı.

Musavat.com olaraq bu hadisəni bir daha xatırladır və bu qalmaqalın tarixdə buraxdığı izi nəzərinizə çatdırırıq.

Musavat.com