İLK yayım saatı - 01:39

Bakıda əməliyyat zamanı polis əməkdaşını bıçaqla qətlə yetirən şəxsin cinayət işi üzrə məhkəmə araşdırması başa çatıb. Polis əməkdaşlarını da müqavimət göstərən təqsirləndirilən şəxsə 20 il həbs cəzası verilib.

Musavat.com xəbər verir ki, hadisə ötən iyulun 7-də Bakının Suraxanı rayonu Binə qəsəbəsi ərazisində baş verib. Əvvəllər dəfələrlə məhkum olunmuş 1983-cü il təvəllüdlü Mehman Məmmədov polis əməkdaşlarına bıçaqlı müqavimət göstərib.

Mehman Məmmədov saxlanılarkən polis əməkdaşı 1986-cı təvəllüdlü Fəxrəddin Nəsirova bıçaqla xəsarət yetirib. Ağır xəsarət alan polis kapitanı Fəxrəddin Nəsirov aldığı xəsarətdən dünyasını dəyişib. Hadisə zamanı Mehmanı saxlamağa çalışan iki polis əməkdaşı da xəsarət alıb.

Hadisənin təfərrüatı...

Mehman daha əvvəl oğurluq və dələduzluq əməllərinə görə məhkumluq həyatı yaşayıb. O, indiyə 41 illik ömrünün 15 ilini həbsxanada keçirib.

Son olaraq isə oğurluqda şübhəli bilinərək Qaradağ Rayon Polis İdarəsi tərəfindən axtarışa verilib. Polislər onun yerini müəyyən edərək saxlamaq istəyiblər. Mehman polislərdən qaçaraq hərbi geyim əldə edib. Lakin polis əməkdaşları onu tanıyıb. Əvvəlcə polis kapitanı Fəxrəddin Nəsirov ondan təslim olmasını tələb edib. Lakin Mehman əldə etdiyi soyuq silah hesab olunan ov bıçağı ilə polis əməkdaşına ağır zərbə endirib. Lakin Fəxrəddin Nəsirov yaralı vəziyyətdə də olsa Mehmanı saxlaya bilib. Digər polis əməkdaşları da müdaxilə edərək Mehmanı zərərsizləşdiriblər. Həmin vaxt iki polis əməkdaşları da xəsarətlər alıb.

Mehmanın ifadəsi...

Mehman deyib ki, axtarışda olduğunu bilməyib. O, əməlindən peşman olduğunu söyləyib. Bildirib ki, polis əməkdaşlarına xəsarət yetirməsini xatırlamır.

“Birinci məni yolda saxladılar. Polis əməkdaşları axtarışda olduğumu bildirdilər. Mən də sənədlərimi təqdim etmək adı ilə maşına yaxınlaşanda maşına oturub qaçdım. Binə qəsəbəsinə gəldim. Hərbi geyim aldım ki, tanınmayım. Dostum Talehin evinə getdim. Talehin evinə çatanda bir nəfər mülki geyimli şəxs məndən alışqan istədi. Sonra məndən adımı soruşdu. Mehman olduğumu deyəndə, qışqırdı ki, odur. Bıçağı çıxarıb sağ əlimdə tutdum. Polis əməkdaşı ilə əlbəyaxa olanda onun yerə yıxıldığını gördüm. Başa düşdüm ki, onu bıçaqla vurmuşam. Polisləri vurmaq niyyətim yox idi. Sadəcə həbs olunmaq istəmirdim. Artıq 15 il həbsxanada qalmışam. Artıq həbsxanadan bezmişdim. Buna görə qaçmaq istəyirdim”- deyə Mehman ifadəsində qeyd edib.

Onun ifadəsindən məlum olub ki, evində gizlənmək istədiyi dostu Taleh olub. O, Talehin bacısı ilə uzun müddət sevgi münasibətində olublar. Buna görə də hadisə vaxtı onlarda gizlənə biləcəyini düşünüb. Lakin polis əməkdaşları əvvəlcədən onun Bakıda əlaqədə olduğu, gedə biləcəyi ünvanları müəyyənləşdirə biliblər. Polislər ilk olaraq Talehin evinə gedərək Mehman gəlməsini gözləyiblər.

Məhkəmədə zərərçəkmiş polis əməkdaşları ifadə verən zaman bildiriblər ki, Mehman bütün tələblərə məhəl qoymayaraq onalara müqavimət göstərib. Mehmanı ilk görən polis əməkdaşı Fəxrəddin Nəsirov olub. Onlar deyiblər ki, Fəxrəddin Nəsirov Mehmanı saxlamaq istəyərkən bıçaq zərbəsi alıb. Onlar da müdaxilə edərək Mehmanı saxlaya biliblər. 

Qətlə yetirilən polis kapitanı Fəxrəddin Nəsirov

Zərərçəkmiş polislər Mehmandan şikayətçi olduqlarını, ona ağır cəza verilməsini istəyiblər. Mərhumun hüquqi varisi, xanımı Mehmana ömürlük azadlıqdan məhrum etmə cəzası təyin edilməsini istəyib.

Mehman Məmmədov Cinayət Məcəlləsinin 120.2.3 (qəsdən adam öldürmə; zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürmə), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə) və 315-ci (Hakimiyyət nümayəndəsinə qarşı müqavimət göstərmə və ya zor tətbiq etmə) maddələri il təqsirli bilinib.

Onun əməli toplanan maddi sübutlar, şahidlər və özünün etirafedici ifadəsi ilə sübuta yetirilib. Bakı Ağır Cinayətlər Məhkəməsi Mehman Məmmədova 20 il azadlıqdan məhrum etmə cəzası təyin edib.

Qeyd edək ki, qətlə yetirilən polis kapitanı Fəxrəddin Nəsirov Qaradağ rayon Polis İdarəsində əməliyyat müvvəkili vəzifəsində çalışırdı. Mərhumun bir övladı var idi.

İlkin Muradov
Musavat.com