Rəsmi Bakı Ermənistanın silahlandırılması üzərindən Azərbaycanın təhdid olunmasına imkan vermək niyyətində deyil, çünki təhlükənin əsas mənbəyini tam dəqiqliyi ilə bilir... Ona görə də, istənilən təhlükəyə əks təzyiq mexanizmləri ilə müqavimət imkanlarına sahib olduğunu qətiyyən gizlətmir, ən sərt və radikal reaksiyanın veriləcəyinə eyham vurur...

Cənubi Qafqaz “nifaq alması”na çevrilib. Böyük ehtimalla hələ uzun müddət belə vəziyyət öz aktuallığını qoruyub, saxlayacaq. Çünki dünya nəhəngləri israrla Cənubi Qafqaza can atırlar. Üstəlik, onların maraqları kəskin şəkildə toqquşur və bu ziddiyyətlər regionda hərbi-siyasi gərginliyi maksimum səviyyəyə çatdırıb. Və bu baxımdan, dünya nəhənglərinin toqquşan geopolitik maraqları ucbatından Cənubi Qafqaz yenidən dağıdıcı savaş məkanına çevrilə bilər.

Maraqlıdır ki, ABŞ və Qərb Rusiya ilə regional qarşıdurmada birmənalı şəkildə Ermənistana istinad edir. Məhz Ermənistan üzərindən Cənubi Qafqazda geopolitik situasiyanı gərginləşdirərək, hərbi vəziyyəti silahlı toqquşma həddinə çatdırmağa cəhd göstərir. Ona görə də, hazırda Ermənistan ABŞ və Qərbin Cənubi Qafqazda hərbi forpostu funksiyalarını öz üzərinə götürüb. Və bunun əvəsində rəsmi İrəvan Qərbdən yalnız siyasi deyil, həm də hərbi dəstək umur.

Onu da qeyd etmək lazımdır ki, bəzi Qərb siyasi dairələri Ermənistanın hərbi sahədə mümkün qədər gücləndirilməsinə də xüsusi önəm verirlər. ABŞ, Avropa Birliyi və Ermənistan arasında keçirilmiş Brüssel konfransı çərçivəsində rəsmi İrəvana verilmiş hərbi xarakterli vədlər də buna örnək rolunu oynayır. Üstəlik, Brüssel konfransının nəticələri yalnız Rusiyada deyil, Azərbaycanda da müəyyən narazılıqla qarşılanmaqdadır. Və rəsmi Bakı bu barədə öz xəbərdarlıq mesajını artıq açıq mətnlə bəyan edib.

Digər önəmli məqamlardan biri də ondan ibarətdir ki, hələlik rəsmi İrəvana yalnız vədlər verən ABŞ və Avropa Birliyindən fərqli olaraq, Ermənistanı artıq silahlandırmağa başlamış ölkələr də mövcuddur. Belə ki, Fransa, Yunanıstan və Hindistan intensiv şəkildə Ermənistana silah-sursat və hərbi texnika gəndərməkdə davam edirlər. Bu baxımdan, rəsmi Bakının xəbərdarlıq mesajının ilk növbədə bu üç ermənipərəst və təxribatçı ölkəyə ünvanlandığı qətiyyən şübhə doğurmur.

Təbii ki, son vaxtlar Azərbaycan-Fransa münasibətlərinin ciddi şəkildə gərginləşməsi də mövcud situasiyanı qəlizləşdirir. Hər halda, rəsmi Paris Ermənistanın silahlandırılması prosesindən Azərbaycana geopolitik təzyiq faktoru kimi yararlanmağa cəhd göstərir. Yəqin ki, Makrom hakimiyyəti bu məkrli siyasətinə düzəliş etməzsə, Azərbaycan-Fransa münasibətləri qopma nöqtəsinə gələ bilər.

Hindistana gəldikdəsə, bu ölkənin xarici işlər naziri Azərbaycan və Ermənistanla yaxın münasibətlərinin olduğunu iddia edib. Halbuki, Ermənistanın silahlandırılması reallığı Hindistanla Azərbaycan arasında tarazlı münasibətlərin mövcudluğundan danışmaq məntiqsiz görünür. Hindistanın rəsmi dairələrisə, Ermənistanın silahlandırılmasını daha çox öz hərbi sənaye kompleksinə real bazarlar açmaq niyyəti ilə əsaslandırmağa çalışır. Və bu bazar axtarışının Azərbaycanın təhlükəsizlik maraqlarını təhdid etməsi isə qarşılıqlı münasibətlərdə çatlar yarada biləcək önəmli faktordur.

Nəhayət, Yunanıstan Azərbaycanın enerji resurslarının əsas alıcıları sırasında yer alır. Rəsmi Afina Yunanıstanın enerji sahəsində ticari tərəfdaşı olan Azərbaycanın təhlükəsizlik maraqlarını görməzdən gələrək, Ermənistanı silahlandırmaqla, olduqca riskli addım atır. Hər halda, rəsmi Bakı hansısa mərhələdə Yunanıstanla enerji əməkdaşlığının əhatə dairəsinə yenidən baxa bilər. Və rəsmi Afinanın Ermənistan ucbatından belə bir situasiya ilə üzləşmək istəyəcəyinə inanmaq bir qədər çərindir.   

Ancaq hələlik rəsmi Bakı Ermənistan silahlandırılması cəhdlərinə mümkün qədər səbrlə yanaşmağa çalışır. Eyni zamanda, Azərbaycanın hərbi təhlükəsizlik maraqlarına real təhdid yaranacağı təqdirdə, rəsmi Bakının dərhal hərəkətə keçəcəyi də qətiyyən şübhə doğurmamalıdır. Çünki Azərbaycan Prezidenti İlham Əliyev bu barədə açıq mətnlə xəbərdarlıq mesajı verib. Azərbaycan lideri vurğulayıb ki, hələlik Ermənistanın silahlandırılması prosesi təhlükəli həddə çatmayıb. Əgər, belə bir təhlükə yaranarsa, Azərbaycan buna dərhal ən sərt şəkildə reaksiya verəcək.

Prezident İlham Əliyev onu da xüsusi olaraq, bildirib ki, Ermənistan və onun arxasında dayananlar çox təhlükəli hərbi-siyasi manipulyasiyalar edirlər. Çünki Ermənistan qlobal qarşıdurmaya cəlb edilməyə növbəti namizədə çevrilə bilər. Yəni, Ermənistanı Qərb və Rusiya arasındakı qlobal qarşıdurma çərçivəsində istifadə edə bilərlər. Və rəsmi İrəvan bunun Ermənistan üçün yaxşı ssenari olub-olmadığına dəqiq qərar verməlidir.

Belə anlaşılır ki, rəsmi Bakı Ermənistanın silahlandırılması ilə Azərbaycanın təhdid olunmasına imkan vermək niyyətində deyil. Prezident İlham Əliyevin bu məsələ ilə bağlı son mesajları rəsmi Bakının Azərbaycana qarşı təhlükələrin hansı iqtiqamətlərdən gəldiyini tam dəqiqliyi ilə bildiyini göstərir. Çünki Prezident İlham Əliyev bəzi dövlətlərin Azərbaycana qarşı “soyuq müharibə” apardığını da vurğulayıb.

Azərbaycan lideri hər hansı dövlətin adını çəkməyə ehtiyac duymasa da, hər halda, həmin ölkələri təxmin etmək o qədər də çətin deyil. Rəsmi Bakının Azərbaycana qarşı istənilən təzyiq cəhdinə, eləcə də, “soyuq savaşa” müqavimət göstərmək əzmində olduğu qətiyyən şübhə doğurmur. Və Azərbaycanın əks təzyiq mexanizmlərinə sahib olması isə buna əminlik yaradır.

Elçin XALİDBƏYLİ,
Siyasi ekspert,
“Yeni Müsavat” Media Qrupu