14 iyun 2023-cü il tarixində Rəqəmsal İnkişaf və Nəqliyyat Nazirliyinin tabeli qurumu “Azərpoçt” MMC və Elm və Təhsil Nazirliyinin tabeliyində fəaliyyət göstərən Təhsil Tələbə Krediti Fondu arasında birgə əməkdaşlıq haqqında anlaşma memorandumu imzalanıb.

İmzalanma mərasimində “Azərpoçt” MMC-nin və Təhsil Tələbə Kredit Fondunun İdarə heyətinin sədrləri və rəhbər şəxsləri iştirak ediblər.

“Azərpoçt” MMC-nin İdarə heyətinin sədri Əfqan Cəlilov bildirib ki, milli poçt operatoru artıq son iki ildir ki, bütün sahələrdə yenilənmə istiqamətini əsas tutur. Belə ki, transformasiya proseslərinə gedən qurum üçün insan resurslarının inkişafı, eləcə də bölgələrdə savadlı mütəxəssislərin işə cəlb olunması və bununla da əmək bazarında kadrların müvafiq iş yerləri ilə təmin edilməsi baxımından bu memorandum mühüm əhəmiyyət kəsb edir.

Tədbirdə Təhsil Tələbə Krediti Fondunun İdarə Heyətinin sədri Araz Paşayev Fondun fəaliyyət istiqamətləri, tələbələrə göstərilən dəstək barədə məlumat verib və bu memorandumun əmək bazarına verəcəyi töhfədən söz açıb.

Qeyd edək ki, memorandum Azərbaycan Respublikasının qanunvericiliyinə, habelə Fondun, Cəmiyyətin Nizamnaməsinə uyğun olaraq qarşılıqlı təcrübə mübadiləsi, sosial cəhətdən həssas ailələrdən olan tələbələrin təhsilə əlçatanlığının təmin edilməsi, təhsil tələbə kreditlərindən yararlanmış namizədlərin poçt, telekommunikasiya və digər əlaqəli ixtisaslara uyğun peşələrə yönləndirilməsi və işlə təmin olunması, bu xüsusda birgə proqramların təşkili və birgə fəaliyyət göstərməklə müştərək layihələrin icra edilməsi məqsədilə qarşılıqlı əməkdaşlığı tənzimləyir.