Bakı şəhəri, Səbail rayonu, Tərlan Əliyarbəyov küçəsində yerləşən gecə klubunda partlayışın qaz balonunda yaranmış sızma nəticəsində baş verdiyi ehtimal olunur. Obyektlərdə, yaxud mənzillərdə qaz balonundan istifadə isə “Azəriqaz” İB-nin səlahiyyətində deyil”.
Bunu Musavat.com-a açıqlamasında “Azəriqaz” İB İctimaiyyətlə əlaqələr şöbəsinin rəisi Eldəniz Vəliyev bildirib: “Obyektin altından yeraltı qaz xətləri ona görə keçmir ki, sızma olduqda qığılcım nəticəsində partlama ehtimalı ola bilər. Bu cür obyektlərdə qaz balonunun işlədilməsinin qanunauyğun yaxud qanunazidd olması isə “Azəriqaz” İB-nin səlahiyyətində olan məsələ deyil. “Azəriqaz” İB qazın satışı ilə məşğuldur. Bizim işimiz sayğaca qədərki prosesə nəzarət etməkdir. 2016-cı ilə qədər “Azəriqaz” İB-nin evlərin, mənzillərin yaxud obyektlərin daxilində qaz təchizatı ilə bağlı prosesləri təftiş etmək imkanı var idi. Qaz balonlarının doldurulması, daşınması və quraşdırılması səlahiyyəti 2016-cı ildən Azərbaycan Dövlət Neft Şirkətinin (SOCAR) "Azəriqaz" İB-dən alınıb. Milli Məclisdə “Qaz təchizatı” haqqında qanuna əlavə və dəyişikliklər nəzərdə tutulur. Təklif olunur ki, sözügedən səlahiyyət yenidən qazpaylayıcı quruma,yəni (SOCAR) "Azəriqaz" İB-ə verilsin. Yalnız bundan sonra (SOCAR) "Azəriqaz" İB-nin obyektlərə, mənzillərə baxış keçirmək, texniki şərtlərə əməl olunub-olunmaması ilə bağlı təftiş aparmaq mümkün olacaq”.
Nigar HƏSƏNLİ,
Musavat.com