Azərbaycanın qeyri-enerji sektorunda investisiya imkanları geniş və çoxşaxəlidir.

Musavat.com xəbər verir ki, bunu Türkiyənin Bakıdakı səfirliyinin baş ticarət müşaviri Yakub Sefer deyib.

Onun sözlərinə görə, Azərbaycanın regional nəqliyyat-logistika, ticarət və tranzit mərkəzə çevrilməsi perspektivi çox yüksəkdir:

"Bura Orta Asiyaya və postsovet ölkələrinə açılan bir qapıdır. Azərbaycanda istehal olunan məhsulu Müstəqil Dövlətlər Birliyi ölkələrinə - 260 milyon əhalisi olan bir məkana rüsumsuz ixrac imkanı var. Burada Azərbaycan dövləti sərmayə yatırıb istehsal qurmaq üçün əvvəla, sənaye parklarında, ikincisi isə Qarabağ bölgəsində böyük güzəşt və imtiyazlar tətbiq edib. Biz şirkətlərimizə bunu deyirik. 2024-cü ildə Türkiyə şirkətləri Misirdə 200 istehsal müəssisəsi açıb. Azərbaycanda da belə müəssisələrin açılması üçün şərait var və biz də şirkətlərimizi buraya dəvət edirik".

Y.Sefer bildirib ki, Ələt böyük logistik mərkəzə çevrilir:

"Dəniz limanı dəmiryol xəttinə birləşdirilib, hava yük limanı inşa olunur, azad iqtisadi zona var. Ələtin nəqliyyat-tranzit potensialını artırmaq üçün bəzi işlərin görülməsinə ehtiyac var. İlk növbədə Xəzərdə yükdaşımalar üçün yeni Ro-Ro tipli gəmilər tikilməlidir, çünki hazırda istismar olunanlar köhnə və aztutumludur".

Baş ticarət müşavirinin fikrincə, Zəngəzur dəhlizinin açılması ilə Azərbaycanın tranzit imkanları kəskin şəkildə artacaq:

"Qatara oturub 6 saata Türkiyəyə çatmaq mümkün olacaq. Bu, həm sərnişin, həm də yükdaşımaların kəskin artmasına gətirib çıxaracaq".

Musavat.com