İllərlə Ankaranın daxili işlərinə qarışan Qərb, indi Türkiyəyə ehtiyac duyduğu üçün “demokratiya” iddialarını bir kənara qoyur – Moskva təhdidi və Vaşinqtonun sərt xətti fonunda Avropa geri çəkilir

Avropa İttifaqı və ümumilikdə Qərb dünyası uzun illərdir ki, Türkiyənin daxili proseslərinə, suveren qərarlarına, terrorla mübarizə siyasətinə və hətta siyasi fiqurların çıxışlarına qədər hər şeyə qarışmaqdan çəkinməyib. Demokratiya, insan haqları və siyasi azadlıqlar kimi dəyərlər daim Ankara ilə münasibətlərdə “təzyiq aləti” kimi istifadə olunub.

Musavat.com bildirir ki, ancaq indi vəziyyət tam dəyişib. "The Wall Street Journal" qəzetinin yazdığına görə, Türkiyədə müxalifətə qarşı atılan addımlar, əvvəlki illərdən fərqli olaraq, artıq Avropada sərt reaksiyalar doğurmur. Səbəb isə sadədir: Avropa artıq Türkiyəyə möhtacdır.

Bir tərəfdən Rusiyanın artan təhlükəsi, digər tərəfdən isə ABŞ-ın Qərbi meydanda tək buraxması fonunda Ankara Qərb üçün strateji tərəfdaşa çevrilib. NATO üçün Türkiyənin əhəmiyyəti artıb, xüsusən də Yaxın Şərq və Qafqazda balans yaratmaq baxımından.

Maraqlıdır ki, Avropanın bu yeni yanaşması fonunda “İmamoğlu faktoru” da fərqli rakursdan qiymətləndirilir. Formal olaraq yerli siyasətçi kimi təqdim edilən bu fiqur, əslində, xarici təsirin bir alətinə çevrilib. Məqsəd, Türkiyənin içəridən parçalanması, birliyinin və bərabərliyinin sarsıdılması, eləcə də ölkənin bölgədə – xüsusən də Suriyada – həyata keçirdiyi mühüm missiyaların zəiflədilməsidir.

Bu səbəbdən də Ərdoğan iqtidarının həm daxildə, həm də xaricdə həyata keçirdiyi əməliyyatlar, milli təhlükəsizlik strategiyaları anlaşılandır və zəruridir. Bu yanaşma yalnız iqtidarın deyil, ümumilikdə Türkiyə dövlətinin mövcudluğunu və sabitliyini qorumaq üçün atılan mühüm addımlardır.

Musavat.com