Avropa ölkələri Co Bayden administrasiyasından səlahiyyət müddəti bitənə qədər Ukraynaya hər cür dəstək verməsini xahiş edir.

Musavat.com xəbər verir ki, məlumatı Bloomberg prosesdən xəbərdar olan şəxslərə istinadən yayıb.

Bildirilir ki, Avropa ölkələrinin liderləri və rəsmiləri ABŞ-dan Kiyevi daha çox silah və sursatla təmin etməyi, gəlirlərini və silah istehsalında istifadə olunan qadağan olunmuş texnologiyalar əldə etmək imkanlarını məhdudlaşdırmaq üçün Rusiyaya qarşı əlavə sanksiyalar tətbiq etməyi xahiş edirlər.

Məsələ ilə tanış olan şəxslər agentliyə bildiriblər ki, Birləşmiş Ştatlar artıq noyabrın sonuna qədər kölgə neft donanmasına və sursat tədarükündən sonra Rusiyaya əsgər göndərən Şimali Koreyaya qarşı yeni sanksiyaların qəbulu üçün çalışır.

Donald Trampın qələbəsindən sonra avropalılar özləri Ukraynanı dəstəkləmək üçün əlavə vəsait axtarmağa və yeni administrasiya dövründə yardımı azaltsalar və ya ondan tamamilə imtina etsələr, ABŞ-ı necə əvəz edə biləcəklərini müzakirə etməyə başlayıblar. Bir sıra Avropa rəsmilərinin fikrincə, əsas problem puldan daha çox hərbi resursların əlçatanlığıdır, çünki silahı əsasən ABŞ təmin edir.

Bloomberg yazır ki, bəzi Aİ liderləri israr edirlər ki, Bayden Ukraynaya Rusiyadakı hərbi hədəfləri vurmaq üçün uzaqmənzilli Qərb raketlərindən istifadə etməyə icazə versin. Bu, avropalıların və ukraynalıların fikrincə, sonuncuya Rusiyanın hücumunu cilovlamağa, cəbhə və arxa obyektləri qorumağa və Trampın təşkil etməyə çalışa biləcəyi mümkün danışıqlardan əvvəl ərazi mövqelərini gücləndirməyə imkan verəcək.

Fransanın Avropa məsələləri üzrə naziri Benjamin Haddad Bloomberg-ə deyib: “Biz amerikalı dostlarımız və tərəfdaşlarımızla əlaqə saxlayırıq və həqiqətən ümid edirəm ki, ukraynalıları dəstəkləməyə davam edəcəyik, o cümlədən uzaq mənzilli raketlərlə zərbələr endirmək məsələsində”. Belə olan halda, onun sözlərinə görə, Rusiyada Ukraynanın müdafiə və infrastruktur obyektlərinin atəşə tutulduğu yerlər onun ərazisinin müdafiəsi çərçivəsində onun üçün qanuni hədəfə çevriləcək.

 

Musavat.com