Avropa Komissiyası (AK) İlon Maska məxsus "X"ə (keçmiş "Twitter") tətbiq ediləcək cərimənin məbləğini müzakirə edir.

Musavat.com xəbər verir ki, məlumatı "Bloomberg" yayıb.

Agentliyin yazdığına görə, Brüssel Maska xəbərdarlıq edib ki, cərimənin məbləği hesablanarkən onun digər şirkətlərinin, o cümlədən "SpaceX" və "Neuralink"in fəaliyyətindən əldə olunan gəlir də nəzərə alına bilər.

"Bloomberg" mənbələrinə görə, AK belə bir qərar qəbul edərsə, cərimə əslində ayrıca şirkət olan "X"dən deyil, Maskın özündən tutulacaq. Eyni zamanda aydınlaşdırırlar ki, "Tesla" avtomobil istehsalçısından əldə olunan gəlir cərimənin məbləği hesablanarkən nəzərə alınmayacaq, çünki bu şirkət Maskın tam nəzarəti altında deyil və onun qiymətli kağızları birjada alınıb-satılır.

"Bloomberg" xatırladır ki, AK "X"i "potensial zərərli məzmuna" ev sahibliyi etməklə Aİ Rəqəmsal Xidmətlər Aktını pozduğuna görə araşdırır. Eyni zamanda agentlik mənbələri qeyd edir ki, Aİ platformaya cərimə tətbiq etmək barədə hələ qərar verməyib. Mask, öz növbəsində, daha əvvəl bildirmişdi ki, Avropa İttifaqı cərimə ilə bağlı qərar qəbul edərsə, o, buna məhkəmədə etiraz etmək niyyətindədir.

Agentliyin məlumatına görə, Aİ-nin rəqəmsal xidmətlər haqqında qanunu zərərli məzmun və dezinformasiya ilə mübarizədə heç bir nəticə olmadıqda şirkətin qlobal gəlirinin 6 faizinə qədər cərimə nəzərdə tutur.

Musavat.com