Avropa Komissiyası Çin elektromobillərinə 35 faizə qədər “tam proporsional” antidempinq rüsumlarına cavab olaraq Pekinin tətbiq etdiyi antidempinq tariflərini əsassız hesab edir.

Musavat.com xəbər verir ki, bunu Avropa İttifaqının iqtisadiyyat və maliyyə nazirlərinin görüşünün yekunlarına dair mətbuat konfransında İqtisadi məsələlər üzrə Avropa komissarı Paolo Gentiloni deyib: "Biz müəyyən sektorlarda həddindən artıq istehsal tədbirləri ilə bağlı ciddi araşdırma apardıq, çox mütənasib qərar qəbul etdik və heç kimin bu proporsional qərara antidempinq tədbirləri ilə cavab verməsi üçün heç bir səbəb görmürük".

Çinin Ticarət Nazirliyi bu gün elan edib ki, Aİ-dən böyük həcmli avtomobillərə idxal rüsumlarının artırılması ilə bağlı tədbirləri nəzərdən keçirir:"Çin Aİ-dən idxal edilən daxili yanma mühərrikli böyük həcmli avtomobillərə tariflərin artırılması kimi tədbirləri öyrənir". Bundan əlavə, Çin milli qanunlara və ÜTT qaydalarına uyğun olaraq Avropadan donuz əti, donuz əlavə məhsulları və süd məhsullarının idxalı ilə bağlı antidempinq və kompensasiya araşdırmaları aparır. Bundan əvvəl nazirlik elan etmişdi ki, oktyabrın 11-dən Aİ-nin Çindən elektrik avtomobilləri üçün tarif artımına cavab olaraq Avropa İttifaqından brendiyə qarşı antidempinq tədbirləri tətbiq edəcək.

 

Musavat.com