Avropa Komissiyası (AK) bir sıra iri avtomobil istehsalçılarını və Avropa Avtomobil İstehsalçıları Assosiasiyasını (ACEA) avtomobillərin utilizasiyası sahəsində kartel sövdələşməsinə getdiklərinə etdiklərinə ümumilikdə təxminən 458 milyon avro cərimələyib.

Tənzimləyici müəyyən edib ki, şirkətlər və ACEA 15 ildən artıqdır ki, rəqabət əleyhinə sazişlər bağlayır və bu sahədə əlaqələndirilmiş tədbirlərdə iştirak edirlər. Kartel üzvləri təkrar emal edənlərə ödəniş etməməyə və onlara avtomobilin hansı hissəsinin təkrar emal üçün yararlı olduğu barədə məlumat verməməyə razılaşıblar.

AK Stellantis, Ford Motor, Bayerische Motoren Werke AG, Mitsubishi, Honda, Hyundai/Kia, Jaguar Land Rover/Tata, Mazda, Opel, General Motors, Suzuki, Toyota, Volkswagen, Volvo, həmçinin ən böyük cəriməni – 81 milyon avronu ödəyəcək Renault/Nissan şirkətlərini cərimələyib.
Həmçinin kartelə daxil olan, lakin bu barədə tənzimləyiciyə məlumat verən Mercedes-Benz cərimədən yayınıb.

Bu arada, Böyük Britaniyanın Rəqabət və Bazarlar İdarəsi (CMA) oxşar araşdırmadan sonra bir qrup avtomobil istehsalçısını və iki sənaye assosiasiyasını ümumilikdə 77,68 milyon funt sterlinq (99,5 milyon dollar) cərimələyib.

 

Musavat.com