Avropa İttifaqı (Aİ) Rusiya qazından imtina etməyə hazırlaşıb.

"Report" xarici KİV-ə istinadən xəbər verir ki, bunu Brüsseldə keçirilən mətbuat konfransında Avropa İttifaqının energetika məsələləri üzrə komissarı Kadri Simson deyib.

“Aİ tranziti Ukrayna vasitəsilə həyata keçirilən Rusiya təbii qazı olmadan yaşamağa hazırdır”, - o bildirib.

K.Simsonun sözlərinə görə, tədarük həcminin 2021-ci ildəki 45 %-dən 2023-cü ildə 15 %-ə qədər azalmasına baxmayaraq, bu göstərici hələ də yüksəkdir.

Qeyd edək ki, Ukrayna vasitəsilə Rusiyadan Avropaya qaz tranziti ilə bağlı müqavilənin müddəti bu ilin sonunda başa çatır. Ukrayna tərəfi onu uzatmayacağını dəfələrlə bəyan edib.