Amerika Birləşmiş Ştatları Ukraynaya 20 milyard dollar kredit ayırmağa qərar verib.

Musavat.com Unian-a istinadən xəbər verir ki, bu barədə prezident Vladimir Zelenski xalqa axşam müraciətində məlumat açıqlayıb: "Amerika 20 milyard dollar ayırmağa qərar verdi. Bunlar Rusiyanın dondurulmuş aktivləri ilə təmin edilən vəsaitlərdir. G7-nin Ukrayna üçün 50 milyard dollarlıq qərarının bir hissəsi bizim müdafiəmiz, dayanıqlılığımız üçündür. Bu, bizi həqiqətən dəstəkləyəcək. Bunu artıq bu il həyata keçirmək vacibdir, Birləşmiş Ştatlara təşəkkür edirəm, bütün Yeddilik Qrupuna təşəkkür edirəm”.

“Le Monde” yazır ki, ABŞ Rusiyanın dondurulmuş aktivlərinin faizləri ilə təminat verilən bu krediti iqtisadi və hərbi yardım olaraq iki yerə bölməyi planlaşdırır. Ağ Evin beynəlxalq iqtisadi məsələlər üzrə milli təhlükəsizlik üzrə müşavirinin müavini Dalip Sinq deyib ki, bu yardım “güclü hesabatlılıq və şəffaflıq tədbirlərinə tabe olan” bir fond olan Dünya Bankı vasitəsilə ötürüləcək. O, xüsusilə enerji və infrastruktura diqqət yetirəcək.

Bu yardımın ikinci yarısı hərbi olmalıdır. Bununla belə, Sinq bildirib ki, bunun üçün “Ukraynaya verə biləcəyimiz xarici hərbi maliyyənin həcmini artırmaq, həmçinin müəyyən texniki dəyişikliklər etmək üçün Konqresin təsdiqinə ehtiyacımız var”.

Qeyd edək ki, bu gün Avropa İttifaqı Şurası Rusiya aktivləri hesabına Ukraynaya 35 milyard avro kredit şəklində maliyyə yardımı paketini təsdiqləyib. Qərar Aİ-nin rəsmi jurnalında dərc olunduqdan bir gün sonra qüvvəyə minəcək.

G7-nin digər üzvlərindən Böyük Britaniya da Ukraynaya 3 milyard dollara yaxın kredit ayırdığını elan edib. Beləliklə, dondurulmuş Rusiya aktivləri hesabına qaytarılmaq şərtilə Ukraynaya ayrılacaq kreditlərin həcmi artıq nəzərdə tutulan 50 milyard dolları keçib. G7-nin digər üzvlərinin də töhfələri nəzərə alınsa, ümumi məbləğin 65 milyard dolları keçəcəyi gözlənilir.

Xatırladaq ki, ABŞ Ukraynaya ayrıca yardım paketi hazırlayır - Ukrayna pilotsuz təyyarələrinin istehsalı üçün 800 milyon dollar.

 

Musavat.com