ABŞ Federal Ehtiyat Sistemi 2023-cü ildə uçot dərəcəsinin qaldırılması nəticəsində faiz xərclərinin artmasından rekord itkiyə məruz qalıb.

Musavat.com xəbər verir ki, “The Wall Street Journal”ın FED-in ilkin hesabatına əsasən yazdığına görə, ötən il ABŞ-ın 12 Federal Ehtiyat Bankının (FRB) ümumi xərcləri onların gəlirlərini 114,3 milyard dollar üstələyib. 2022-ci ildı əvvəl FED 58,8 milyard dollar xalis mənfəət əldə etmişdi.

FED-in açıq bazar əməliyyatları vasitəsilə alınan qiymətli kağızlar üzrə faiz gəliri 2023-cü ildə bir əvvəlki ilə nisbətən 6,2 milyard dollar azalaraq 163,8 milyard dollar təşkil edib. Eyni zamanda ümumi faiz xərcləri 178,7 milyard dollar artaraq 281,1 milyard dollara çatıb. Xüsusən Federal Ehtiyat Bankı maliyyə institutlarının Mərkəzi Bankdakı depozitləri üzrə faizlərin ödənilməsinə bir il əvvəllə müqayisədə 116,3 milyard dollar, repo əməliyyatları üzrə satılan qiymətli kağızlara isə 62,4 milyard dollar çox xərcləyib.

Amerika Mərkəzi Bankının bəyanatında deyilir ki, Federal Ehtiyat Bankının iki kredit proqramı, Bank Müddətli Maliyyələşdirmə Proqramı və Əmək haqqının qorunması Proqramı üzrə Likvidlik Mexanizmi çərçivəsində əldə etdiyi ümumi faiz gəliri 10,4 milyard dollar təşkil edib.

Ötən il 12 Federal Ehtiyat Bankının əməliyyat xərcləri 5,5 milyard dollar təşkil edib.

Qanuna uyğun olaraq, Federal Ehtiyat Sistemi əldə etdiyi mənfəəti əməliyyat xərcləri və dividend ödənişləri çıxılmaqla ABŞ Xəzinədarlığına köçürür. Mənfəətin xərcləri ödəmək üçün yetərli olmadığı dövrlərdə Amerika Mərkəzi Bankı təxirə salınmış aktiv adlanan vəsaiti təyin edir. 2023-cü ildə “təxirə salınmış aktiv” 116,4 milyard dollar artaraq 133 milyard dollara çatıb. Bu o deməkdir ki, FED Xəzinədarlığa ödənişləri bərpa etməzdən əvvəl həmin məbləği (əməliyyat xərcləri çıxılmaqla) qazanmalı olacaq. FED-dən bildiriblər ki, "təxirə salınmış aktiv" FED-in pul siyasətinə və maliyyə öhdəliklərini yerinə yetirmək qabiliyyətinə təsir etmir.

Musavat.com