İtaliyanın Abruzzo bölgəsində yaşayan bir şəxs, görmə qüsuru olduğu iddiası ilə dövlətin əlillik pensiyasını alaraq, 2017-ci ildən bu yana “kor” statusunda idi. Lakin onun velosipedə olan sevgisi bu saxtakarlığı ifşa etməyə səbəb oldu.

Musavat.com İtaliya mediasına istinadla xəbər verir ki, bu şəxs 7 il boyunca heç bir çətinlik çəkmədən şəhərin küçələrində velosiped sürüb, gündəlik həyatda aktiv şəkildə iştirak edib və ətrafdakılara tamamilə sağlam biri kimi görünüb. Bütün bu illər ərzində isə hökumətdən əlillik pensiyası adı altında təxminən 100 min avrodan çox pul alıb.

Əksər hallarda görmə qabiliyyətindən məhrum olan insanlar ictimai nəqliyyat və ya xüsusi nəqliyyat vasitələrindən istifadə edir. Lakin bu şəxsin, görmə məhdudiyyəti olan birinə uyğun olmayan şəkildə velosiped sürməsi yerli sakinlərin diqqətini çəkib. Nəticədə yerli hüquq-mühafizə orqanları araşdırmalara başlayıb və saxtakarlıq aşkara çıxarılıb.

Hazırda bu saxta əlillik pensiyasının hansı yollarla təsdiqləndiyi və illər boyunca necə aşkar edilmədən qaldığına dair istintaq davam edir. Hadisə İtaliyada sosial təminat sisteminin nə qədər boşluqlara malik olduğunu göstərir və saxta əlillik pensiyalarının qarşısının alınması üçün qanunvericilikdə islahatlara ehtiyac olduğunu ortaya qoyur.

İctimaiyyət isə bu hadisəyə həm təəccüblə, həm də qəzəblə yanaşır. Bir çoxları dövlətin maliyyə resurslarının ehtiyacı olmayan şəxslərə sərf edilməsinin qarşısının alınması üçün daha ciddi nəzarət mexanizmlərinin tətbiq edilməsini tələb edir.

 

Musavat.com

@@TVmusavat/101184@@